Больш за дзесяць год існуе ў нашай школе этнаграфічны комплекс, у які ўваходзіць Хатка з бабулінай душой і Купалаўскі дворык. Цікавасць да яго застаецца нязменнай, бо ўдзел ў яго стварэнні прымалі настаўнікі і вучні школы, дапамагалі іх бацькі. Кожны экспанат тут – памяць аб нечыіх продках. У кожнай рэчы жыве душа тых, хто яе вырабляў.
Спачатку ўзнікла задума стварыць інтэр’ер вясковай хаты пачатку дваццатага стагоддзя. Але якая ж хата без падвор’я? Побач знайшоўся і ўтульны куточак двара. Вось разное акенца, вось навес, пад якім сабраны сельскагаспадарчыя прылады. Ёсць калодзеж-журавель, цячэ ручаёк. Вясной і летам шмат кветак. Усё, як у добрага гаспадара. Можа, і сам Янка Купала тут спыніўся б. А значыць і дворык будзе Купалавым.
У Купалаўскі дворык любяць прыходзіць дзеці і дарослыя, каб сфатаграфавацца, пасядзець у сапраўдных санях, паспрабаваць набраць вады з калодзежа-жураўля.
Купалаўскі дворык мае ўжо добрую традыцыю. Тут сталі праводзіцца і літаратурныя мерапрыемствы. Паэтычны марафон сабраў сямікласнікаў, якія чыталі вершы, прысвечаныя маці і Радзіме. А напярэдадні 135-годдзя са дня нараджэння Янкі Купалы тут прайшлі Купалаўскія чытанні, у якіх удзельнічалі вучні розных класаў.
|